ຮອງເຈົ້າແຂວງສະຫວັນນະເຂດ ລົງກວດການກໍ່ສ້າງຮ່ອງລະບາຍນ້ຳຫ້ວຍລົງກົງ ແລະ ສະໜາມຂີ້ເຫຍື້ອ

ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ທັງເປັນປະທານຊີ້ນຳໂຄງການພັດທະນາຕົວເມືອງຕາມແລວເສດຖະກິດຕາເວັນອອກ – ຕາເວັນຕົກອະນຸພາກພື້ນແມ່ນ້ຳຂອງ ( ໂຄງການ GMS ) ພ້ອມຄະນະພະແນກການທີ່ກ່ຽວຂ້ອງ ແລະ ໂຄງການ ໄດ້ລົງໄປຢ້ຽມຢາມເບິ່ງຄວາມຄືບໜ້າການກໍ່ສ້າງປັບປຸງຮ່ອງລະບາຍນ້ຳຫ້ວຍລົງກົງ ແລະ ສະໜາມຂີ້ເຫຍື້ອ ນະຄອນໄກສອນພົມວິຫານ ແຂວງສະຫວັນນະເຂດ ເຊິ່ງເປັນໂຄງການຍ່ອຍຂອງໂຄງການ GMS.
ໂອກາດນີ້ຕາງໜ້າໃຫ້ບໍລິສັດຜູ້ຮັບເໝົາກໍ່ສ້າງ ໄດ້ລາຍງານໃຫ້ຮູ້ວ່າ: ຕາມທີ່ໄດ້ເຊັນສັນຍາກັນໃນວັນທີ 14 ພະຈິກ 2017 ບໍລິສັດກໍ່ສ້າງທາງເລກ 8 ຮ່ວມກັບ ບໍລິສັດ ໄຕເຈືອງເຊິນ ກໍ່ສ້າງຈຳກັດ ເປັນຜູ້ຮັບເໝົາກໍ່ສ້າງຄອງລະບາຍນ້ຳເປື້ອນສະຖານີສູບນ້ຳ ແລະ ປະຕູປ້ອງກັນນ້ຳຖ້ວມໂຄງການຫ້ວຍລົງກົງ ນະຄອນໄກສອນ ພົມວິຫານ ໃນມູນຄ່າ 1,6 ລ້ານກວ່າໂດລາສະຫະລັດ.
ມາຮອດປັດຈຸບັນໄດ້ສຳເລັດການກໍ່ສ້າງຄອງລະບາຍນ້ຳຍາວ 650 ແມັດ, ຕ້ານເຈື່ອນປາກຫ້ວຍລົງກົງ, ການກໍ່ສ້າງເຮືອນເຄື່ອງປ້ຳນ້ຳຍັງເຫຼືອພຽງແຕ່ຕັດຫຼັງຄາ ແລະ ການຕົກແຕ່ງ, ອັນທີ່ຍັງຄ້າງກໍແມ່ນການຕິດຕັ້ງໄດປ້ຳນ້ຳ ແລະ ປະຕູປິດ – ເປີດ. ຮອດປັດຈຸບັນການກໍ່ສ້າງລວມສາມາດປະຕິບັດໄດ້ 94%.

ນອກນັ້ນ, ກໍຍັງໄດ້ຮັບວຽກເພີ່ມຄືການກໍໍ່ສ້າງລະບົບບຳບັດນ້ຳເປື້ອນ ເຊິ່ງໄດ້ເລີ່ມລົງມືຈັດຕັ້ງປະຕິບັດໃນຕົ້ນເດືອນທັນວາ 2019 ມີມູນຄ່າ 8,2 ແສນໂດລາສະຫະລັດ, ການກໍ່ສ້າງມາຮອດປັດຈຸບັນສາມາດປະຕິບັດໄດ້ 58% ຄາດວ່າຮອດເດືອນກໍລະກົດ 2020 ຈະໃຫ້ສຳເລັດ 100% ຕາມແຜນການ.
ຈາກນັ້ນ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ພ້ອມຄະນະ ກໍໄດ້ໄປເບິ່ງການກໍ່ສ້າງສະໜາມຂີ້ເຫຍື້ອບ້ານຊອກ ນະຄອນໄກສອນ ພົມວິຫານ ໂດຍແມ່ນ ບໍລິສັດ ວີເອັສພີ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງໃນມູນຄ່າ 1,65 ລ້ານກວ່າໂດລາສະຫະລັດ ເຊິ່ງມີການປັບປຸງສະໜາມກຳຈັດຂີ້ເຫຍື້ອທີ່ຖືກຫຼັກສຸຂະນາໄມ, ຈັດຊື້ອຸປະກອນເພີ່ມຕື່ມ, ລົດເກັບຂີ້ເຫຍື້ອ ແລະສິ່ງອຳນວຍຄວາມສະດວກຢູ່ສະໜາມຂີ້ເຫຍື້ອ, ໃຊ້ເວລາການກໍ່ສ້າງ 2 ປີ ເຊິ່ງໄດ້ເລີ່ມກໍ່ສ້າງໃນວັນທີ 22 ມີນາ 2018 ຮອດປັດຈຸບັນກໍໃກ້ສຳເລັດ 100% ແລ້ວຍັງບາງໜ້າວຽກເພີ່ມຕື່ມເລັກໜ້ອຍເທົ່ານັ້ນ.

ໃນການກໍ່ສ້າງລວມມີອາຄານບໍລິຫານ 1 ອາຄານ, ອາຄານສຳລັບພະນັກງານພັກອາໄສ, ອາຄານສຳລັບຄັດແຍກຂີ້ເຫຍື້ອ, ອາຄານຝຸ່ນບົ່ມ, ອາຄານຕາກອາຈົມ, ທາງປູຄອນກຣີດ, ຊິງຊັ່ງນ້ຳໜັກລົດຂີ້ເຫຍື້ອ, ຂຸມຖິ້ມຂີ້ເຫຍື້ອ ແລະ ອ່າງບຳບັດນ້ຳຂີ້ເຫຍື້ອ.

Comments

comments

Leave a Reply