ໂຄງການ GMS ເຊັນສັນຍາກໍ່ສ້າງວຽກເພີ່ມອີກ 6 ໂຄງການຍ່ອຍ


ພິທີເຊັນສັນຍາກໍ່ສ້າງວຽກເພີ່ມ 6 ໂຄງການຍ່ອຍຂອງໂຄງການພັດທະນາຕົວເມືອງຕາມແລວເສດຖະກິດຕາເວັນອອກ – ຕາເວັນຕົກອະນຸພາກພື້ນແມ່ນ້ຳຂອງ ຫຼື GMS ໄດ້ຈັດຂຶ້ນໃນວັນທີ 19 ມີນາຜ່ານມາ ທີ່ຮ້ານອາຫານລາວວິວ ນະຄອນໄກສອນ ພົມວິຫານ ໂດຍການເປັນກຽດເຂົ້າຮ່ວມໃນພິທີຄັ້ງນີ້ຂອງ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ທັງເປັນປະທານຄະນະຊີ້ນຳໂຄງການ GMS, ທ່ານ ຄຳທະວີ ໄທພະຈັນ ຫົວໜ້າກົມເຄຫາ – ຜັງເມືອງ, ມີພະແນກການກົມກອງທີ່ກ່ຽວຂ້ອງຂອງ ແຂວງ, ນະຄອນໄກສອນ ພົມວິຫານ, ທີ່ປຶກສາໂຄງການ ຕະຫຼອດເຖິງບັນດາບໍລິສັດຜູ້ຮັບເໝົາກໍ່ສ້າງໃນ 6 ໂຄງການຍ່ອຍເຂົ້າຮ່ວມ.
ທ່ານ ພົມມາ ວົງພະຈິດ ຫົວໜ້າໂຄງການ GMS ໄດ້ກ່າວລາຍງານໂດຍຫຍໍ້ກ່ຽວກັບໂຄງການກໍ່ສ້າງວຽກເພີ່ມວ່າ: ໂຄງການພັດທະນາຕົວເມືອງ ເປັນໂຄງການເງິນກູ້ຢືມ ແລະ ຊ່ວຍເຫຼືອລ້າຈາກທະນາຄານພັດທະນາອາຊີ ລວມມູນຄ່າທຶນທັງໝົດ 47,74 ລ້ານໂດລາສະຫະລັດ ເຊິ່ງລວມມີ 7 ໜ້າວຽກຫຼັກ ທີ່ກວມເອົາໃນ 3 ຕົວເມືອງຂອງແຂວງສະຫວັນນະເຂດ ຄື: ນະຄອນໄກສອນ ພົມວິຫານ, ເທສະບານເມືອງພີນ ແລະ ບ້ານແດນສະຫວັນ ເມືອງເຊໂປນ.
ສຳລັບການເຊັນສັນຍາວຽກເພີ່ມຄັ້ງນີ້ແມ່ນເປັນການເຊັນສັນຍາວຽກເພີ່ມຈາກສັນຍາແມ່ ທີ່ໄດ້ຮັບການຈັດຕັ້ງປະຕິບັດມາກ່ອນ ເຊິ່ງລວມມີ 6 ສັນຍາ ດັ່ງນີ້:
ພາບປະກອບຂ່າວເທົ່ານັ້ນ
1 ໂຄງການບຳບັດນ້ຳເປື້ອນຫ້ວຍລົງກົງ ໃນເນື້ອທີ່ 2,7 ເຮັກຕາ ໃຊ້ບຳບັດດ້ວຍ ລະບົບດີວັດເຊິ່ງຜ່ານການ ຮັບຮອງການອອກແບບໂດຍ ອົງການບໍດາ ໃນມູນຄ່າ 861.250,76 ໂດລາ, ຜູ້ຮັບເໝົາແມ່ນບໍລິສັດເລກ 8 ຮ່ວມກັບ ບໍລິສັດ ໄຕເຈືອງເຊິນ ແລະ ວາງທໍ່ນ້ຳເປື້ອນຈາກສະໜາມຂີ້ເຫຍື້ອເກົ່າລົງຫາບໍ່ບຳບັດສະໜາມໃໝ່ ຄວາມຍາວ 127 ແມັດ ມູນຄ່າ 19.820,76 ໂດລາ ໂດຍແມ່ນ ບໍລິສັດ ວີເອັສ ພີ.
2 ໂຄງການກໍ່ສ້າງເສັ້ນທາງເຂົ້າສູ່ສະໜາມບິນ ຄວາມຍາວ 730 ແມັດ, ປູຢາງອັດສະຟານ ໜາ 5 ຊັງຕີແມັດ, ມູນຄ່າໃນການກໍ່ສ້າງແມ່ນ 356.974,37 ໂດລາ ໂດຍແມ່ນບໍລິສັດເລກ 8 ຮ່ວມກັບ ບໍລິສັດ ໄຕເຈືອງເຊິນ.
ພາບປະກອບຂ່າວເທົ່ານັ້ນ
3 ໂຄງການກໍ່ສ້າງເສັ້ນທາງເບຕົງ ແຕ່ທ່າບັກເກົ່າຫາເສັ້ນທາງຄັນທະບູລີ ສວນສາທາລະນະກຸວໍລະວົງ ຄວາມຍາວ 459,5 ແມັດ, ໜາ 20 ຊັງຕີແມັດ ມູູນຄ່າ 310.000,06 ໂດລາ ໂດຍແມ່ນ ບໍລິສັດ ລາວມີໄຊ.
4 ໂຄງການກໍ່ສ້າງເສັ້ນທາງເບຕົງ ໜາ 23 ຊັງຕີແມັດ, ຈາກເສັ້ນທາງສັນຕິພາບຫາເສັ້ນທາງສີສະຫວ່າງວົງ ຖະໜົນສຸຂາວະດີ ຍາວ 292 ແມັດ ມູນຄ່າ 299.988,96 ໂດລາ ໂດຍແມ່ນ ບໍລິສັດ ລາວມີໄຊ.
5 ໂຄງການກໍ່ສ້າງທາງ ເຂົ້າສູ່ຊຸມຊົນບ້ານອາໂລນ ເມືອງເຊໂປນ ຍາວ 673 ແມັດ, ປູຢາງໜຽວ 2 ຊັ້ນ ມູນຄ່າ 264.410,72 ໂດລາ ໂດຍແມ່ນ ບໍລິສັດ ໜູຄຳ ກໍ່ສ້າງ.
6 ໂຄງການກໍ່ສ້າງເສັ້ນ ທາງເຂົ້າສູ່ຊຸມຊົນບ້ານນາ ໂພ ເມືອງພີນ ຍາວ 619 ແມັດ, ປູຢາງໜຽວ 2 ຊັ້ນ ມູນຄ່າ 189.224,69 ໂດລາ ໂດຍແມ່ນ ບໍລິສັດ ໄຕເຈືອງເຊິນ ເປັນຜູ້ຮັບເໝົາກໍ່ສ້າງ.

Comments

comments

Leave a Reply